ആർഷ ചന്ദ്രൻ....രഹസ്യം

രഹസ്യം
---------
കവിതയിൽ ഞാനൊരുവനെ
ഉറക്കിക്കിടത്തിയിട്ടുണ്ട്‌
ഹൃദയത്തുമ്പു കൊണ്ട്‌ മെരുക്കി
അക്ഷരപ്പൂട്ടിട്ട്‌ കെട്ടിയിട്ടുണ്ട്‌
പ്രണയം കൊണ്ടവനെ അദൃശ്യനാക്കിയിട്ടുണ്ട്‌
നോട്ടത്തിന്റെ മുൾമുനയിൽ
ഞാനവനെ നഗ്നനാക്കിയിട്ടുണ്ട്‌
ഓരോ അണുവും പച്ചയ്ക്ക്‌-
തുറന്നെഴുതി വെച്ചിട്ടുണ്ട്‌
സ്നേഹം കൊണ്ട്‌ നിശ്ശബ്ദനാക്കി
നഖങ്ങളാൽ, സൂക്ഷ്മമായി കൊലചെയ്തിട്ടുണ്ട്‌.

ഈ താളുകളിൽ അവന്റെ-
ഒരു തുള്ളി രക്തം വീണുകിട്ടുമെങ്കിൽ
നിങ്ങൾക്കെന്നെ തുറുങ്കിലടയ്ക്കാം
അതിഗൂഡമായൊരു പ്രണയകഥ
പൊളിച്ചെഴുതാം.

****
ആർഷ ചന്ദ്രൻ
------------------
മാധ്യമം ആഴ്ചപ്പതിപ്പ്‌